Moris iha Dili, tinan 65 liu baa. Wainhira sei joven iha tempu Timor Portuges, kunesidu no naran Menu MauTuk, tan isin badak maibe futubolista Timoroan ida mak joga iha Klubu Benfica iha Dili. Kuandu nia joga, hau sempre ba asiste tan ami hela hamutuk iha Bairo Economico, Dili, besik kedas Estadio Municipal, Dili.
Iha tempu neeba, maske ami hela hamutuk no hau nia Aman, Inacio Fernandes, fundador ida Klubu Uniao no Klubu Morcegos maibe Manu Meno la joga husi klubu rua nee, tan nia tekniku ass tebes, nunee Klubu Benfica mak sosa nia.
Wainhira funu Maun Alin akontese, Manu Meno tenki dadur hamutuk ho hau nia Apa Boot, Joaquim Jacob dos Reis Fernandes (Pai Nani) no hau nia Aman, Inacio Fernandes husi tinan 1975 too 1977. Nia asiste oinsa nia Aman, Pai Nani, masakradu iha Aileu. Husi tinan 1975, nia mak akompana hau nia Aman, Inacio Fernandes nudar Prizoneiru Politik Fretilin nian refuzia husi Dili, iha QG, Taibesi, ba Aileu, Maubisse, Same, Viqueque no ikus liu iha Laisorilai, Quelicai iha 1977. Terus no susar barak mak sira haree no sira hetan rasik.
Hafoin Militar Indonezia kaptura, hahu servisu iha Dinas Penerangan Propinsi Timor-Timur no kontinua nudar futubolista iha klubu sira iha Dili. Tinan 1980 mai leten, fila ba Laclo, serve nudar Liurai iha Suco Uma Kaduak durante tinan 10 nia laran no ikus sai nudar Anggota DPRD Manatuto nian.
Iha kedas tinan 1980 ital, hahu servisu Klandestina hodi fo apoiu ba Luta ba Ukun Rasik Aan. Hau hatene deit mak, dalawain mak Manu Meno no hau nia Aman no familia seluk militar no polisia Indonezia sempre bolu ba inkeritu tan eventu ruma mak akontese iha Dili eh Manatuto. Iha Rede Klandestina nian, Mano Meno ikus liu asumi responsabilidade nudar Adjunto Reziaun III Manatuto, no hetan ona Kondekorasaun nudar Kombatenti Libertasaun Nasional.
Mano Menu horiseik ba hamutuk ona ho Pai Nani, Pai, Tio Padre Francisco Fernandes, Manu Zito kalo, Komandante Pantera Negra, Falintil nian, Mano Ko Boot no Mano Ko Kiik. Imi halo ona buat ruma ba Timor~Leste nia funu ba Ukun Rasik Aan no imi eduka ami atu hadomi Rai Doben Timor~Leste liu hosi imi nia sakrifisiu no determinasaun.
Lao ba Maromak Nia Kadunan Murak, hodi ho ami nia domin tomak. Iha Lalehan neeba, hamutuk ho O nia Aman Nain Rua, O nia Maun no O nia Alin, tau matan nafatin mai ami.
Lao ba ho O nia mehi rohan laek.
Reda~Let, Ilimanu, Laclo
22 04 2020
About Post Author
