DILI – Prezidente Boavista FC Timor Jose Ramos Horta husu ba governu atu tau orsamentu bo’ot ba area desportu hodi dezenvolve ona desportu hanesan nasaun seluk.
Tuir Horta katak futebol iha Timor-Leste mak juventude no populasaun hotu gosta liu desportu ne’e la’o iha ita nia rai la’os futebol deit mak sira gosta, maibe sira hadomi hotu desportu.
Problema mak ne’e governu seidauk tau orsamentu sufisiente ba desportu atu Timor promove ita nia desportu ba mundu seluk.
“Hau hare iha Timor ekonomia sei fraku no ita labele hanoin atu hare liu ba seitor privadu sira atu apoiu ba desportu hanesan rai sira seluk maibe governu mos labele taka matan atu tau osan” relata Ramos Horta ba jornalista iha nia kna’ar fatin Metiaut, Kinta (28/01).
Nia hateten estadiun munisipal Dili to’o agora governu halo rehablitasaun tinan ba tinan mos seidauk hotu, tanba ne’e governu tenki halo desizaun diak ida hodi tau orsamentu diak ba desportu iha Timor-Leste atu rezolve infrasturtura liu-liu ba estadiun.
Governu mak hanesan liu husi Sekretariu Estadu Juventude Desportu (SEJD) tenki halo dialogu ho klubu sira atu hare liu ba programa saida mak klubu sira nia presija, no governu mos halo programa ba tempu naruk laos hanoin deit kada tinan.
Tanba hakarak Timor-Leste marka prezensa ba joga iha nasaun seluk tenki manan la’os lakon hela deit no pior liu mak estadiun laiha, dehan nia.
“Ita moe kuandu Timor-Leste ba joga iha Indonesia aluga fali estadiun hodi jogador sira joga, tanba governu la investe osan makas ba desportu.”
Ho problema ida ne’e governu tenki hanoin ona atu investi osan bo’ot ba desportu hodi finaliza tiha Estadiun Munisipal Dili atu labele fo osan ba aluga ema nia estadiun.
Eis Prezidente Republika afirma desportu importante ba nasaun hotu iha mundu tanba nasaun sira iha Europa bo’ot sira ne’e investimentu hodi tau osan bo’ot liu ba Desportu hanesan marketing ida hodi halo nasaun sira sai riku.
Tan ne’e hau husu ba governu favor tenki hadomi desportu no sosiedade sira atu imi bele tau orsamentu bo’ot ba iha area desportu atu nune’e futebol iha Timor sai bo’ot duni. (Eug).
About Post Author
