Home Notisia Governu Entrega Premiu Apresiasaun Ba Atleta Prestasaun Iha AUG Ho SPG 2022

Notisia

Governu Entrega Premiu Apresiasaun Ba Atleta Prestasaun Iha AUG Ho SPG 2022

December 21, 2022

224 views

DILI-(Desportu XYZ) Menisteriu Edukasaun Juventude no Desportu (MEJD) reprezenta Sekretariu Estadu Juventude Desportu (SEJD) entrega ona premiu apresiasaun ba atleta sira ne’ebé hetan prestasaun ho medalla 12 iha Sea Para Games (SPG) iha Solo, Indonesia no medalla ha’at iha Asian University Games iha sidade Ubon Ratchathani, Tailanndia iha tinan 2022.

“Ohin ita mai hamutuk atu atribui premiu ba ita atleta ne’ebe sai manan nain hodi lori medalla mai Timor-Leste iha jogu desportu nivel rejional rua maka AUG iha Tailandia ne’ebe ita nia atleta hetan medalla ha’at no Sea Para Games iha Indonesia ne’ebe ita nia atleta hetan medalla 12 iha tinan ida ne’e”, tenik MEJD Armindo Maia ba jornalista sira liu husi nia diskursu iha serimonia atribui premiu apresiasaun iha SEJD tersa (20/12).

Nia haktuir, regulamentu ne’ebé maka ita nia estadu atribui premiu apresiasaun liu husi finanseiru ba atleta manan nain sira tanba ne’e hakarak lori oitavu governu nia naran hato’o parabens bá Atleta manan nain sira hamutuk ho treinador sira iha jogu AUG no Sea Para Games 2022.

Tanba ne’e ita hein katak atribuisaun premiu apresiasaun ne’e fó satisfazsaun no insentivu ba atleta sira nia prestasaun hodi enkoraja atleta sira hodi hasae prestasaun no rekor atleta idak-idak ho ekipa nian.

Iha fatin hanesan Atleta paralimpiku Teofilo Freitas hatete, Premiu ne’e ha’u hakarak agradese ba SEJD hamutuk CPNTL no federasaun ne’ebe rekoñese ami atleta defisiente hodi distribui premiu bá ami atleta sira ne’ebé manan medalla iha Sea Para Games tinan 2022 iha Solo, Indonesia

“Orsamentu ne’ebe simu sei utiliza hodi halo preparasaun bá ekipamentu no alimentasaun ba eventu internasional ne’ebe sei realiza iha Cambodia no Guangzhou no China”

Entretantu atleta paralimpiku sira ne’ebe mak hetan medalla 12 iha Sea Para Games iha Solo mak husi modalidade atletizmu Teofilo Freitas simu premiu apresiasaun orsamentu montante 10,500 USD, Domingas da Costa hetan 2, 500 USD, Domingos simu 2,500 USD no treinador Odete Amaral hetan 2,500 USD, Husi modalidade hit besi Antonio J. Aniceto simu 3,000 USD ho nia treinador João de Brito hetan 1,500 USD, husi modalidade tenis meza Abelita Borges simu 2,500, Pasquela dos Santos hetan 4,000 USD, Bernardo de Carvalho simu 750 USD, Rogerio Cabral hetan 2,500 USD.

Enkuantu, ba atleta sira ne’ebe hetan medalla ha’at iha AUG 2022 mak husi modalidade Felisberto de Deus simu 1,750 USD, husi modalidade voleibol praia atleta Tito Morais hetan 468.75 USD, atleta Joel Valente Savio simu 468.75 USD no husi modalidade Taekwondo Ana da Costa hetan 750 USD.