DILI-relasiona ho Federasaun 8 ne’ebé mak atu ba partisipa iha eventu Sea Games Hanoi Vietnam iha fulan Maio tinan ne’e, Confederasaun Desportu Timor Leste (CDTL) iha planu atu konsentra atleta sira hotu iha Kazerna.
Prezidenti CDTL Macario Sanches hato’o lia hirak ne’e ba jornalista sira, hafoin remata reunião ho federasaun 8 iha salaun CDTL segunda (25/01)
“agora dadauk atleta sira sei halo preparasaun iha ida-idak nia fatin, maibé fulan ida antes desloka ba Sea Games atleta sira konsentra iha fatin kazerna ida hodi kontrola no oinsa atu eduka sira hamosu nasionalismu atu para mosu ekipa nasional ida deit”
Nia dehan, ami mos deskuti konaba oinsa mak federasaun sira ne’e prepara kalendario trenamentu no programa ba formasaun sira ne’e atu nune’e parte CDTL nia ekipa bele halo akompaniamentu husi progresu husi inisiu to remata.
“ami mos deskuti uitoan konaba asesu ba fundu ne’ebé mak disponivel, tanbá governu liu husi Sekretario Estadu Juventude no Desportu (SEJD) aloka ona orsamentu $ 81 mil ba federasaun sira atu bele jere ba preparasaun atleta sira nia alimentasaun”
Macario hatutan, iha alimentasaun ami deskuti konaba oinsa mak federasaun sira prepara menu hahan, tanbá federasaun ida-idak nia menu la hanesan, entaun ita husu ba sira bele prepara hela menu ruma atu nune’e iha prosesu tenderizasaun ruma ita bele kontrola ona kualidade hodi fo enerzia ba atleta sira bele kompete iha Sea Games.
Konaba fatin atu halo konsentra atleta sira ne’e, CDTL sei husik lai federasaun sira halo preparasaun iha ida-idak nia fatin, depois hela fulan ida hanesan ne’e mak foin konsentra iha fatin ida, maibé fatin ne’e CDTL sei deskuti ho Comite Olimpico Nasional Timor Leste (CONTL) no SEJD atu para determina fatin ne’ebé seguru diak liu ba atleta sira.
Sikun seluk prezidenti Federasaun Natasaun Laurentinho de Jesus informa, hakarak agradese ba prezidenti CDTL eleitu, tanbá pelu primeira vez halibur federasaun sira hotu bele tur hamutuk koalia konaba preparasaun Sea Games.
No preparasaun atleta sira nian ohin kuaze federasaun sira hatete katak, atleta hotu kuaze halo preparasaun ona i teknikamente oinsa mak CDTL bele hare asuntu ida ne’e atu bele asegura preparasaun.
Entertantu CDTL aban sei hasoru malu ho SEJD atu deskuti oinsa mak atu halo lansamentu official ida ba atleta nasional sira molok ba kompete iha eventu Sea Games tinan ne’e iha Hanoi Vietnam no lansamentu sei halo iha loron 4 fulan Fevereru.
Enkuantu Federasaun 8 ne’ebé mak atu partisipa iha Sea Games hanesan, Federasaun Kartedo, Boxing, Taekwondo, Atletismu, Natasaun, Fútebol no seluk tan.
About Post Author
