DILI—Confederasaun Desportu Timor -Leste (CDTL) aloka ona orsamentu preparasaun hamutuk $ 57.600.00 ba federasaun 7 ne’ebé atu partisipa iha eventu Sea Games Hanoi Vietnam iha fulan Maiu tinan ne’e.
Orsamentu refere aloka ba iha alozamentu no subsidiu mensal ba atleta inklui treinador sira atu halo preparasaun másimu molok partisipa jogu Sea Games iha Vietnam fulan Maiu tinan 2022.
Federasaun 7 ne’ebé mak CDTL atribui orsamentu mak hanesan, Taikwondo total hamutuk nain 11 atleta 9 no trenador 2 hetan orsamentu $ 9.720.00, Atletismu $ 8.640.00, Boxing $7.560.00,Karate-do $6.480.00, Natasaun $4.320.00, Halterofelismu $6.480.00, no Fútebol nia finansiamentu sei mai husi Federasaun Fútebol Timor Leste (FFTL)
Prezidenti CDTL Macario Sanches hatete, ba subsidiu mensal ba kada atleta simu dollar Amerikanu atus-ida (100.00 USD) no treinador (125.00 USD) no ba fulan tolu no CDTL aloka orsamentu hamutuk $17,600.00.
Nia informa, husi fundus ne’ebé iha CDTL rezerva mós fundus ba konsentrasaun atletas sira molok aranka ba Vietnan no total orsamentu ne’ebé Sekretariu Estadu Juventude no Desportu (SEJD) atribui ho valor $ 81.000.00.
“ CDTL ohin bolu prezidente federasaun 7 ne’ebé sei kompete iha Sea Games iha Vietnam atu mai hamutuk iha ne’e hodi CDTL bele atribui sira nia subsidiu alimentar no subsidiu mensal ba preparasaun durante fulan tolu no mós esplika ba federasaun sira katak osan ne’e mai husi orsamentu jeral estadu ne’ebé mak SEJD aloka mai iha CDTL” dehan Macario ba jornalista sira iha edifisuiu CDTL, segunda (07/02)
Macario sublina, subsidiu sira ne’ebé CDTL atribui atu motiva federasaun sira halo preparasaun ba atleta sira ho másimu hodi bele garante prestasaun iha eventu sea games ne’ebé sei mai,no federasaun sira mos tenki responsablidade ba relatorio tuir orsamentu ne’ebé iha.
Iha fatin hanesan, prezidesnte Federasaun Karate-do Timor-Leste (FEKATIL), Filomeno Soares de Araujo afirma, ho subsidiu ne’ebé iha bele tulun atleta sira halo preparasaun di’ak liutan hodi ba kompete iha Sea Games Vietnan, tanba durante ne’e atleta no treinadór sira utiliza osan rasik hodi halo movimentasaun ba treinamentu fiziku no taktiku iha fatin diferenta.
“Ami nia atleta no treinadór sira treina fiziku iha GMT no tekniku iha sentru Delta”afirma nia
Filominu haktuir,Ezekutivu ne’e garante Karate-do sei oferese medalla ba Timor-Leste tanba durante ne’e iha ona preparasaun di’ak.
sorin seluk, prezidente Federasaun Taekwondo Timor-Leste (FTTL), Gabriel da Costa, hatete, hanesan ezekutivu federasaun sempre halo akompanamentu ba atleta sira hodi nafatin garante sira nia kualidade preparasaun atu bele iha kondisaun ida-diak maski sira hela iha uma hodi ba tuir treinamentu iha sentru treinamentu Taekwondo iha Tibar munisipiu Likisa.
“Ami sempre akompanha sira no ami garante sira nia kualidade”, Gabriel da Costa hatete.
Atu garante prestasaun iha eventu sea games treinadór hamutuk ho ezekutivu federasaun sempre halo avaliasaun ba kada sesaun treinu atleta sira nian no bandu atu atleta sira konsumu hahán ne’ebé nia proteina barak inklui asegura husi dopajen nune’e bandu atleta sira konsumu aimoruk arbiru.
“Ita bandu ita nia atleta sira han arbiru no hemu aimoruk seim reseita husi doutor”, nia haktuir. Prezidente Taekwondo ne’e subliña, taekwondo kompremetidu atu lori fila medalla osan mean iha eventu sea games vietname
About Post Author
