DILI – Atleta hosi Jar Fitness, Auxiliadora Goncalves sai manan na’in feto ho klase miss figura 2020 iha ekipa Kompetisaun body building, sábadu (24/10).
Ema besik rihun ida maka entuziazmu asiste kompetisaun hatudu dezenvolvimentu fíziku hoot pezu nian, iha arredór Timor Plaza fin semana la’o ho susesu.
Kompetisaun kategoria feto miss figura 2020, mosu iha palku feto timoroan sira la moe hodi hatudu parte pozitivu ne’ebé sira iha hodi kompete no anima públiku iha palku leten.
Hafoin sa’e palku no hatudu atrasaun fíziku ba dala rua, no tama iha faze final, atleta ho númeru konkorrente 53 hetan nomeasaun hosi ekipa juri hodi sai kampiaun ba miss figura 2020 nian.
“Agradese ba maromak bele hetan oportunidade ida ne’e,” espresa Auxiliadora Gonçalves ba Timor Post hafoin nia simu prémiu nu’udar manan na’in iha palku kotuk.
Nia konta, fofoun nia hoot besik iha tinan 2018 iha JAR Fitness, loloos ne’e nia ba atu hakerek ninia teze kona ba JAR fitness nian, hafoin nia mós hola parte iha atividade ne’e.
“Maibé ha’u hetan kontaktu hosi JAR fitness,” nia haktuir hodi rekoñese la mehi sai atleta tanba la rutina halo atividade ne’e no mós okupadu ho eskola.
Iha sábadu ne’e antes ba kompete, nia laiha esperansa atu manan, maibé ikus mai sorte monu duni ba nia.
“Ha’u agradese ba JAR Fitness, maun treinadór sira, maun atleta sira,” tenik auxiliadora hodi dehan nia mai kompete tanba hetan motivasaun no konfiansa.
Auxiliadora , Moris iha data 04 Maiu 1995 oan hosi Domingos do Santos no inan Teresinha Gonçalves dos Reis orijen hosi Munisípiu Ermera.
Hala’o eskola iha ECB públiku Atsabe, SMP Públiku Hatolia, no kontinua eskola sekundária iha São Miguel Arcanjo Comoro. Atualmente Finalista UNTLn iha departamentu akuntabilidade.(ato)
About Post Author
