DILI – Komisaun organizadora Tasa Nino Koni Santana 2020 iha munisípiu Lautem hato’o klarifikasaun hodi haloos notísia kona-ba jogadór Edit Savio foin lalais.
“Notísia ne’ebé ami asesu iha nee (Lopalos) balun loos, maibé kona ba Edit Savio tama sela ne’e la loos,” Delcio da Costa Guimaraes, atuál prezidente komisaun organizadora tasa Komandante Nino Konis Santana 2020, ba desportu xyz, segunda (14/12).
“Tuir loloos konfirma mai ami, tanba ami maka hatene liu” afirma prezidente komisaun ne’e hodi haktuir katak nia duni maka envolve iha momentu rezolve dezintendimentu entre Edit Savio ho Anuku.
“Edit Savio tama sela ne’e laloos” tenik prezidente komisaun ne’e.
Komisaun mos rejeita katak fó priviléjiu ba Edit Savio. “ la’ós priviléjiu ba nia, ami fó sansaun no Edit Savio simu sansaun hodi la joga dala rua, nune’e Edit kumpre,” haktuir xefe komisaun ne’e.
Aleinde ne’e, Komisaun organizadór tasa komandante Nino Koni Santana presiza federasaun futeból FFTL ninia tulun atu fornese árbitru hodi dirije jogu oitavu finais to rohan.
“Ami infrenta hela menus árbitru, ami halo ona proposta ba FFTL, ami hein sira nia tulun,” deklara komisaun.
Jogu tasa komandante Nino Konis Santana iha munisípiu Lautein hala’o iha fulan kotuk partisipa hosi ekipa futeból 61, remata ona faze kualifikasaun grupu ba 32 no finaliza mós faze 16 finais, no oras ne’e hakat mai oitavu finais, seidauk bele kontinua tanba defikulta iha menus árbitru derije jogu.
“Ami seidauk kontinua oitavu fianais tanba árbitru asosiasaun futeból Lautein derije hela jogu juveníl,” afirma prezidente komisaun hodi husu atu federasaun FFTL bele tulun sira lalais finaliza tasa NKS 2020 nian. (Augusto).
About Post Author
