Dili – Treinadór Dili of Institut Teknologi (DIT), Mial Baliebata Armand hateten, sira sei tau importansia liu atu hamate liña avansadu liman karuk no los husi Ponta Leste nian, nune’e sira bele manan jogu refere.
Tuir treinadór ne’e katak, sira nia preparasaun atu hasoru Ponta Leste ladun másimu liu, maibé sira nia preparasaun de’it iha parte balun ke presiza importante liu, tanba Ponta Leste sira nia oportunidade barak mai husi parte liña avansadu, liman los no karuk mak sempre halo krosing bola maka’as, tanba ne’e hanesan treinadór sei tau importansia liu atu hamate husi parte refere.
“Ami la iha jogadór avansadu ne’ebé úniku, atu hasoru ekipa adversáriu, tanba ida ne’e jogu ekipa, ne’ebé hanesan jogadór ne’ebé selesaun ho foin sae de’it, ita kontinua tau fiar nafatin”. Hateten treinadór ne’e iha LFTL Xanana Sport Centre, Sexta (27/11/2020).
Treinadór ne’e mós iha optimista hakarak nia ekip manan iha jogu refere, maibé depende ba jogadór sira mak hatudu sira nia preformence jogu iha kampu laran.
“Hanesan treinadór so bele halo preparasaun de’it ba tátiku jogu, mentalidade, no mós físiku jogadór sira nian”.
Nia mós afirma, bainhira jogadór sira implementa estratéjia sira hanesan ne’e hodi bele hasoru ekipa adversáriu hanesan ne’e bele hetan vitória.
Enkuantu treinadór ne’e hateten, bainhira jogadór sira mantein jogu hanesan antes ne’e kontra Karketu, sei bele manan jogu refere, Iha jogu aban kontra Ponta Leste.
“Hau apresia jogadór sira, tanba sira rona no halo tuir instrusaun ne’ebé fó ba sira, tanba ne’e hau fiar aban sira sei hatudu buat ne’ebé di’ak”. Dehan nia.
Nia mós hatutan, nia ekipa tenki manan, tanba istória DIT seidauk manan Ponta Leste, tanba ne’e maske ho preparasaun ne’ebé ho mínimu, maibé hakarak manan hodi hakat ba kuatru finais.
Relasiona ho kondisaun jogadór maiória ho kondisaun di’ak, maske iha ida ka rua mak kondisaun sei dauk másimu, maibé agora sira hahú rekupera sira nia saúde atu hasoru jogu aban. (Vidal).
About Post Author
