DILI-Diretór verifikasaun no Lisensa Liga Futebol Timor-Leste (LFTL), deklara iha klubu 12 mak iha interese foti ona formulariu no klubu ida mak rejistu ona iha jogu taxa 12 de Novembru tinan ne’e.
Tuir diretór verifikasaun no lisensa LFTL, José Carvalho iha nia entrevista ho jornalista desportu.xyz hateten, Lalenok United mak hahú rejistu ona iha LFTL atu partisipa iha taxa 12 de Novembru tinan ne’e.
“Lalenok United mak lori ona lista jogadór hamutuk 22 mai rejistu ona iha LFTL, entaun prosesu ne’e lao hela tanba klubu sira foin remata husi jogo kopa FFTL foin liu ba semana kotuk, tan ne’e dala ruma tarde tanba sira sei hadi’a buat balun iha klubu laran”. Dehan diretór ne’e iha nia knár fatin, LFTL Xanana sporting Center, Tersa (27/10/2020).
Tan ne’e, nia espera tempu badak klubu sira sei ativu hodi rejistu atu partisipa ba jogu taxa 12 de Novembru tinan 2020.
Enkuantu diretór ba verifikasaun ba jogu LFTL ne’e, esklarese relasiona ho kritéria ba klubu sira sei la rigorozu tanba iha hela situasaun Covid-19, tan ne’e klubu sira lori de’it dokumentus sira hodi submete ba LFTL hodi tau konsiderasaun sai komprovativu, nune’e perante jogu la’o bele halo verifikasaun bele ho di’ak.
Diretór ne’e informa, relasiona ho jogadór estranjeiru sira atu reforsa iha klubu sira, sei kompostu husi ema na’in lima, maibé iha nain tolu mak sei tama iha lista, no rua tama ba joga, ida sai hanesan suplentu.
Haree ba oráriu ba jogu taxa 12 de Novembru ne’e rasik, diretór ne’e seidauk fó sai tanba ne’e kompeténsia kompetisaun jogu nian, maibé nia parte espera bele akontese iha loron 13 Fulan Novemberu ba leten.
“Kona ba sansaun klubu sira ne’ebé karik la partisipa iha jogu taxa 12 de Novembru ne’e, buat jurídiku ninian, maibé jogu ida ne’e tama ona iha kalendáriu liga Futebol Timor Leste ninian, ne’ebé kalendáriu ida fixu, ne’e jogu ida obrigatoriu ba klubu sira atu partisipa. Nia hakotu.
Antes ne’e diretór ba verifikasaun no Lisensa LFTL deklara ona katak, klubu sira atu rejistu to’o 25 fulan Outubru tinan ne’e, maibé tanba preokupasaun klubu sira nian ba hela jogu kopa FFTL, entaun prolonga tan to’o 30 de Outubru fulan ne’e to’o remata. (Vidal)
About Post Author
