Dili – Tuir vise presidente Assosiasaun Profisionál Taekwondo Timor Leste (APTTL) Deolindo Fernandes do Rosario hateten, assosiasaun hamrik la’os hanoin de’it atu treinu atléta sira tuku-tebe hanesan produtu finál ida, maibé iha buat importante ida mak loke mós kursu lian Inglés no Portugés ba atléta sira atu aprende.
Tuir nia katak, banhira fó treinu ba atléta sira kona-ba tuku-tebe, tenki hatene mós língua Inglés no Portugés, tanba lingua hanesan xave ida hodi halo komunikasaun ho ema nasaun seluk.
“APTTL harii mós kooperativa ida, ne’ebé kopera ho sekretariu estadu koperativa, ne’ebé agora nia estatutu remata ona. Aléim ne’e fó mós formasaun lian Inglés no Portugés, ba Atléta sira tanba ne’e importante tebes, se bainhira atléta sira ba tuir kompetisaun internasionál ruma, ita la presiza buka ho ema tradutór ruma kona-ba lingua hodi lakon osan barak. Hateten vise presidente APTTL ne’e, iha sira nia fatin treinamentu iha Comoro-Ponte foun, Domingo (07/03/2021).
Treinadór ho sintu metan (dan2) ne’e informa tan, daudaun ne’e husi Embaisada Korea ba Timor-Leste, husu ona sira nia treinadór nain 6 atu fó treinu tan atléta sira iha eskola hanesan, São José, St. Inacio de Loiola
APTTL hahú eziste iha tinan 2019, ne’ebé inisía harii husi treinadór junior na’in 10, ne’ebé nia training Center lokaliza iha Comoro-Ponte foun, ho nia fasilidade ne’ebé naton hodi fasilita atleta sira.
Durante hari APTTL, Ami la hetan apoiu ruma husi doador sira, ka ba governu, maibé uza ami nia fundus rasik, ba oin governu apoiu tan ami ne’e di’ak liu tan, tanba ami mos pertense ba Desportu TL nian.
Tuir vise presidente ne’e katak, loloos sira atu bolu treinadór internasionál balun atu mai hanorin atléta sira, maibé tanba covid-19, entaun sei suspende.
Daudaun ne’e, APTTL iha nia treinadór hamutuk 35 iha teriotriu laran, no akumula ona membru foun mais ou menus 80 resin iha Training Center Comoro Ponte 3. Tanba ne’e, iha tenpu besik, sei halo ezame ba atléta foun sira.
APTTL hahú loke ona nia liras iha munisípiu balun, hanesan Maliana, Ermera, Suai, Aileu, Viqueque, Baucau inklui sanak barak liu iha Dili. Nune’e mós ba oin sira planu atu loke hotu iha teritoriu Timor-Leste.
Membru foun iha ne’e besik 80 (Training Center Comoro-Ponte 3), iha Delta I 30, iha Ermera-Rai Laco 80 Balibo 68, inklui sira seluk kuaze 80 ba leten tanba lista seidauk mai hotu, ne’ebé bele dehan besik mil.
Nune’e mós vise presidente ne’e mós dehan, objetivu prinsipal APTTL nian mak hakarak, naloke ba ema hotu no haburas atléta Taekwondo Timor-Leste sai buras no profisionál liu tan iha futuru oin mai.
Objetivu prinsipal APTTL mak atu hadia prestasaun taekwondo Timor Leste liu husi hadia trasparensia, fairplay, no respeitu hirarkia. (Vidal).
About Post Author
