DILI- Governu, liu husi Ministériu Asuntu Parlamentar no Komunikasaun Sosiál (Mapcoms) Francisco Jerónimo, ofisialmente lansa diretamente jogu abertura torneiu futsal Mapcoms cup nian ba tinan 2020.
Iha diskursu governante ne’e hateten, jogu refere hanesan parte ida hodi kria relasaun di’ak entre instituisaun governu no orgaun komunikasaun sira.
“Hau nia mensajen ba ita hotu katak, ita hotu presiza bok áan lorloron, nune’e bele haforsa ita nia saude”. Dehan nia iha diskursu ba abertura jogu entre ekipa BNCTL kontra Mapcoms iha kampu futsal Bebora-Dili, Tersa (27/10/2020).
Enkuantu, jogu refere kria atu ema hotu bele halo exersisiu, hodi kuida saude, relasiona ho situasaun Covid 19, neebe mak mundu tomak enfrenta inklui Timor Leste mós hasoru.
Governante ne’e mós husik hela lia ikus ba ekipa sira atu partisipa jogu ne’e katak, joga ho di’ak, no laos atu joga atu tebe malu, maibé joga atu kria amizade ba malu.
Iha fatin hanesan komisaun organizadora ba torneiu futsal Mapcoms cup ne’e Estevao Belo hateten, torneiu ne’e hanesan torneu Mapcoms nian hodi kria amizade entre media sira no ministeriu balun, nune’e bele festeza loron boot 28 de Novembru nian.
Enkuantu ekipa sira Nia ne’ebé mak atu partisipa iha jogu refere hamutuk 48, ekipa feto 19 no ekipa mane 28.
Tanba ne’e jogu ne’e rasik sei hala’o to’o loron 27 fulan Novembru tinan ne’e. (Vidal).
About Post Author
