Dili-Governu Japaun, liu husi nia ajensia, Japan International Cooperation Agency (JICA) iha Timor-Leste iha komitmentu hakarak ajuda governu Timor-Leste (TL) nia programa festival nasionál desportu, ne’ebé sei realiza iha tinan oin.
Asuntu hirak ne’e hato’o husi representante JICA iha TL, Ko Goto, bainhira remata enkontru ho Sekretáriu Estadu Juventude no Desportu (SEJD), Abrão Saldanha iha Salaun SEJD nian, Lecidere-Tersa (22/12/2020).
Tuir representante JICA iha TL, ne’e hateten, sira sei ajuda uluk programa festival desportu nasionál, ne’ebé sei hala’o iha tinan oin, no mós iha hanoin atu lori sira nia voluntariu atu apoiu ba area desportu iha TL.
“Kona-ba desportu atu apoiu daudaun ne’e, ezemplu hanesan voleibol, basketbol no futebol, ne’ebé seidauk deside loloos iha area prioridade sira, tanba sei iha diskusaun internal ninian, tanba sei apoiu uluk ba festival”.
Nune’e mós representate ne’e informa tan, kooperasaun ne’e hanesan dahuluk, tan ne’e iha programa seluk atu ajuda sei la’o tuir nia etapa.
“Rehabilitasaun kampu sira ne’e bele iha posibilidade, maibé ne’e tanba foin dahuluk halo koperasaun entre SEJD ho JICA, entaun hahú husi etapa ba etapa”. Dehan Ko Goto.
Enkuantu Sekretariu Estadu Juventude no Desportu (SEJD), Abrão Saldanha mós hateten, enkontru kortejia ho JICA ne’e atu haree posibilidade saida mak sira atu fó apoiu.
“Sira hakarak fó apoiu ba programa governu nian ida festival nasionál desportu, ne’ebé sei realiza iha tinan oin”.
Sekretariu estadu ne’e mós akresenta, iha diskusaun ne’e sira deskute mós atu esplora tan koperasaun seluk iha area infrastrutura nian, maibé parte JICA hatan, sira nia prioridade ba infrastrutura halai liu ba estrada, no area transporte ninian. (Vidal).
About Post Author
