Tuir kalendáriu órgaun Liga Futeból Timor Leste (LFTL) nian, iha époka tinan ne’e atu realiza hikas jogu Play Off, hodi promove tan ekipa segundu divizaun rua, sa’e ba primera divizaun hodi kompleta tan númeru ekipa primera divizaun ne’ebé antes ne’e iha 8, nune’e bele kompleta ba 10.
Tanba ne’e, oras ne’e daudaun ekipa segundu divizaun balun hahú submete ona sira nia lista jogadór sira ba órgaun LFTL nian hodi halo verifikasaun antes hahú jogu apuramentu.
Nune’e tuir Presidente Acádemica Fc, Gil Conceição hateten, jogu play of ba ekipa segundu divizaun époka tinan ne’e, sira hahú halo ona preparasaun no lista jogadór haruka ona LFTL.
“Jogu play of ba ekipa segundu divizaun atu promove ba primera divizaun mak Acádemica Fc manan ne’e sorte di’ak, se la manan mós nafatin hein oportunidade seluk”. Hateten Presidente Acádemica Fc ne’e iha nia knaár fatin UNTL, Kinta (04/03/2021).
Nune’e mós nia hateten, sira nia partisipasaun iha Futeból Timor Leste, la’os atu buka manan de’it, maibé hakarak kontribui mós ba dezenvolvimentu futeból.
Ita partisipa iha jogu iha esperansa hakarak hetan vitória, maibé haree mós ba situasaun Covid-19, tanba nasaun hotu iha mundu preokupa, hanesan mós Ita, maibé nafatin halo preparasaun, para bele fasilita ita iha situasaun defísil ne’e.
Acádemica Fc hahú treinu ona semana rua, no jogadór sira halo ona kontratu, lista jogadór mós hatama ba ona iha LFTL, mais ou menus iha jogadór rua nulu resin neen ida mak haruka ba.
Ne’ebé ami hein de’it, bainhira jogu play off atu hahú.
Nia mós informa, sira la iha kontratu ho jogadór estranjeiru ruma, tanba ne’e uza de’it jogadór lokál sira.
Estranjeiru ami kontatu duni balun, maibé tanba situasaun Covid-19, entaun la iha kontratu ruma, tanba nia mai presiza prosedimentus barak.
Diretór Ezekutivo Igualidade Jéneru UNTL ne’e mós relata, daudaun ne’e sira prepara hela ho jogadór junior sira ne’ebé mak antes ne’e lori ekipa Acádemica sai segundu lugar iha jogu U16 nian iha tinan 2019.
Ami prepara hela sira, ne’ebé espera sira bele lori buat di’ak mai ekipa Acádemica Fc ba époka tinan ne’e. (Vidal).
