Federasaun Futebol Timor-Leste (FFTL), sei realiza jogu Liga Feto segundu divizaun iha loron 5 fulan Marsu tinan 2021 no primeiru divizaun dia 6 Marsu tinan ne’e.
Tuir Diretur kompetisaun FFTL Zelazio Da Silva hateten, kalendariu jogu ba liga feto ekipa teknika perpara ona, maibe sei iha enkontru orgaun ezekutivu ida atu tur hamutuk hodi aprova kalendariu refere foin mak ami tekniku sira hein ezekuta.
“Kalendariu tentativa ba jogu segundu divizaun no primeiru divizaun fiksu ona tuir data apuramentu iha loron 5 no 6 Marsu 2021” relata Zelazio ba jornalista iha Sede FFTL, Kinta (18/02).
Nia hatutan Federasaun sei loke hela rejistrasaun ba klubu primeiru divizaun no segundu divizaun, maibe iha klubu Buibere mak foin halo rejistu.
Klubu lima (5) ne’ebé mak sei partisipa iha primeru divizaun mak hanesan Buibere FC, Maranatha FC, AD SLB Laulara, Akademika FC, Samuser FC, no segundu divizaun mak: Baucau, São Jose, Nain Feto, VDL, no Maudoko.
Kompetisaun liga feto tinan ne’e la hanesan ho tinan kotuk liu ba, tanba FFTL halo kompetisaun Liga Feto husi primeiru divizaun, segundu divizaun no terseiru divizaun hamutuk deit ba jogu primeiru divizaun.
Nia dehan antes fahe klubu sira ne’e ba primeiru divizaun no segundu divizaun, ami bolu uluk klubu primeiru divizaun sira hotu hodi deskuti hamutuk iha enkontru no segundu enkontru ho klubu segundu divizaun.
Iha enkontru refere federasaun fo rekezitu tolu ba klubu primeiru divizaun no segundu divizaun hanesan, klubu tenki rejistu iha ministeriu Justisa diresaun Notariadu, klubu tenki halo kompletu estrutura, no konta bankaria, tanba FFTL tinan ne’e atu atribui Finansiamentu. (Eug).
