Konfederasaun Desportu Timor-Leste (sigla Portugues CDTL) ho estrutura tomak aprezenta programa eventu internasional rua iha tinan 2021 ba Sekretariu Estadu Juventude no Desportu (SEJD).
Prezidenti CDTL Afraino Xavier hateten objetivu ohin ne’e ba dahuluk CDTL halo primeiru aprezentasaun programa eventu internasional tinan 2021 ba SEJD hodi buka solusaun hamutuk atu desidi atleta sira ba tuir eventu internasional.
“Programa importante ne’ebé mak CDTL aprezenta ba SEJD hanesan, Sea Games realiza fulan Novenmbro iha Vietnam, no besik liu mak jogu Olimpiku realiza fulan Jullu to Agostu iha Tokyo, Japaun” informa Afraino ba jornalista iha eis sional SEJD, Kinta (18/02).
Konaba jogu pontos Olimpicos defenitivu tiha ona ho Atleta 4, trenador nain 3, hanesan federasaun Atletismu mane ida, Taekwondo feto ida trenador ida, Swimming ka nani feto ida mane ida no trenador ida.
Nia hatutan CDTL sei halo preparasaun ba atleta sira ba jogu Olimpicos, no mos husu apoiu orsamentu oituan husi SEJD.
Eventu Sea Games, SEJD sei fo fali tempu mai CDTL atu halo avaliasaun ba modalidade hirak ne’e, tanba Sekretariu Estadu Juventude no Desportu Abrão Saldanha hakarak atleta ne’ebé mak iha prestasaun diak foin bele ba eventu Sea Games.
Tan ne’e iha tempu tuir mai CDTL sei halo fali aprezentasaun modalidade ida-ida ba SEJD tuir modalidade ida-idak nia prestasaun.
Prezidenti CDTL haktuir progarama 10 ne’ebé mak ami propoin ba, SEJD senti programa hirak ne’e todan tebes ba sira.
Iha fatin hanesan Sekretariu Estadu Juventude no Desportu Abrão Saldanha afirma katak orsamentu apoiu ba eventu Olimpico iha Tokyo, Japaun hamutuk dolar rihun 30 liu.
Maibe SEJD sei hare hela problema moras COVID19 invade mundu tomak, tanba ita seidauk hatene lolos Aviaun ita mak aluga ka, uza tiket hodi nune’e ita bele buka solusaun ba orsamentu refere. (Eug).
