Dili – Tuir Sekretáriu jerál AD-SLB Laulara Domingos Caero informa, prezensa João Pedro nian iha klubu primeira divizaun Malasya nian ne’e representa Bandeira RDTL, laos representa klubu AD-SLB Laulara.
Tuir nia katak, daudaun ne’e sira halo hela kontatu ho nia, liu husi mensajen via WattApp.
“Ami sempre mensajen nia, no nia mós sempre kontatu ami nia Sekretáriadu katak agora nia sei prepara no ema sei halo hela avaliasaun nia fisíku, saúde no nia performance”. Hateten Sekretáriu jerál AD-SLB ne’e iha salaun Xanana Sport Center-Segunda (15/02/2021).
Sekretáriu jerál AD-SLB ne’e mós dehan, nia sempre hateten ba familia atu reza nafatin, nune’e João Pedro bele haforsa ekipa primera divizaun Malasya nian.
“Hau sempre haruka mensajen ba nia katak, nafatin kuidadu saúde no mantein nafatin disiplina ne’ebé iha ona.
Prezensa João Pedro iha klubu Malasya laos tanba SLB, maibé ne’e representa Bandeira RDTL, se nia hahú joga duni iha klubu ne’ebé nia ba, ita nia sidadaun sira iha ne’eba sei lori ita nia Bandeira RDTL ba partisipa, ne’e orgullu bot ida ba Timor Leste.
Nia afirma, banhira João Pedro sai husi Timor ba Malaysia, sira nia hanoin ba markadór Makikit Laulara ne’e ba laos tanba klubu, maibé ba tanba representa Timor.
Enkuantu, relasiona ho liga Futeból Timor Leste ne’ebé sei akontese tinan ne’e, maibé Sekretáriu jerál SLB Laulara ne’e informa, João Pedro nafatin tama iha line up, AD-SLB nian, bainhira jogadór refere karik la konsege kontratu ho klubu primeira divizaun Malasya nian ba époka tinan ne’e. (Vidal).
