Dili – Governu Portugal, liu husi nia embaizada iha Timor Leste, kompromotidu atu apoiu fó tékniku no formasaun ba organization desportivu sira, bainhira Timor Leste sei sai uma na’in ba jogu Comunidade Países da Lingua Portuguesa (CPLP) ne’ebé sei realiza iha fulan jullu tinan 2022.
Tuir embaizador Portugal ba Timor Leste, Pedro Machado informa, tuir loloos jogu CPLP akontese ona iha tinan 2020, maibé tanba situasaun Covid-19, nune’e hodi suspende jogu refere.
Tanba ne’e, liu husi reiuniaun Conselho Munistro CPLP ninian, hodi deside jogu CPLP sei realiza fali iha fulan jullu 2022, tanba ne’e sira sei fó apoiu ba Timor Leste iha preparasaun ba eventu ne’e.
“Ohin kolia mós pontus importante ida kona-ba realizasaun jogu CPLP, ne’ebé mak Timor Leste mak sei sai uma na’in ba jogu refere, maske ita sei hasoru hela situasaun Covid-19, maibé serteza iha tinan oin sei akontese eventu bot ne’ebé Timor Leste mak sei Organiza”. Hateten Embaizadór ne’e, hafoin remata enkontru ho Sekretariu Estadu Joventude no Desportu, Abrão Saldanha iha edificio SEJD, Lecidere-Kinta (11/02/2021).
Entretantu, Sekretariu Estadu Juventude no Desportu (SEJD), Abrão Saldanha mós relata, ita presiza duni komunidade Portugal atu apoiu ita iha setór tékniku iha organizasaun sira, tanba foin primera vez Timor Leste realiza eventu nivel alta sira hanesan ne’e.
“Orsamentu Ita nian, tanba ita mak sai uma na’in, sira so apoiu tékniku no formasaun ba organizasaun sira, tanba ne’e ita presiza sira nia esperiénsia atu ajuda ita iha eventu bot ne’e, nune’e ita bele susesu”. Hateten nia.
Enkuantu iha jogu CPLP ne’e kompostu husi modalidade 9, hanesan Atletismu ba mane no feto, Atletismu PPD mane no feto, Basquetebol ba feto, Futeból ba mane, Taekwondo ba feto no mane, voleibol de praia ba feto no mane, Karate ba feto no mane, Xadres ba feto no mane, no Tenis feto no mane. (Vidal).
