Dili – Presidente Liga Futeból Timor Leste (LFTL) Nilton Gusmão informa, husu ba klubu sira atu labele preokupa ho atividade jogu laiha adeptus, tanba ita hotu tenki kumpri ba protokolu saude mundial nian.
Lia hirak ne’e, atual presidente LFTL ne’e afirma hodi responde ba deklarasaun ekipa primeira divizaun Boavista de Timor nian, ne’ebé antes ne’e deklara ona katak, bainhira jogu la’o la iha deptus sira sei la partisipa.
“Klubu sira tenki komprende situasaaun covid-19, tanba ida ne’e laos ema ida nia hakarak, tanba ne’e ita tenki kumpri protokolo saude publiku nian, atu nue’e labele hetan transmisaun ba covid-19 ne’e rasik”.
Ita buka oinsa atu halo atividade sem adeptus, atu ne’e bele minimiza situasaun sira hanesan ne’e. Tanba hau hanoin la iha adeptus la iha influensia ba klubu.
Presdidente LFTL ne’e hateten tan, jogu la iha adeptu ne’e laos deit iha ita nia rain, maibé iha mundu mós jogu la’o laiha adeptus mós jogu kontinua la’o.
“Iha nasaun sira dezenvolvidu ba futeból ne’e sira nia adeptus ne’e mak fontes de reseita, maibé bainhira adeptus la iha ne’e sira sofre tebes. Maibe ita nia adeptus ne’e seidauk sai fontes de reseitas, tanba fontes de reseitas atu ajuda klubu sira mak subsidiu no premiu husi governu ne’ebé governu prepara fo ba klubu sira”.
Ita la’os atu limite adeptus hotu, maibe sei iha adeptus ne’ebe ho numeru ne’ebé naton. (Vidal).
