DILI – Guarda rede Aderito Raul Fernandes kontratu termina ona ho Boavista FC Timor iha fulan Dezembru 2020 no Boavista husik guarda rede selesaun nasional refere livre transferensia.
Guarda rede selesaun nasional Timor-Leste Aderito, durante hahu nia kareira primeiru hamutuk ho klubu AS Ponta Leste no nia konsege lori Ponta Leste sai kampiaun dala tolu hanesan, Super Taca, Taca 12 Novenbro, no Taca Onra.
Iha 2018 guarda rede Aderito fila haforsa klubu Atletico Ultramar no konsege hatudu nia performe brillante hodi lori klubu ne’ebé mak reprezenta munisipiu Manatutu ne’e konkista tan Taca 12 Novembro dala rua tui-tuir malu.
Tuir guarda rede Aderito katak antes muda husi Assalam ba Boavista FC Timor, “Hau hetan kontratu ba jogu rua hanesan Copa FFTL no Taca 12 Novembro.
“Ha’u nia kontratu termina ho klubu Boavista iha fulan Dezembru 2020 no iha janela transferensia epoka 2021 hau livre ona husi transferensia” relata Aderito ba media Desportu XYZ iha kampu demokrasia kuarta (26/01).
Nia hateten iha momentu kontratu termina Boavista fo karta kontratu ida mai hau atu asina maibe karta ne’e seidauk asina, ha’u lori tia ba uma.
Depois liu tia loron ha’at hau asina tia kontratu iha karta ne’e hau lori mai entrega ba klubu maibe estrutura klubu la simu ona karta kontratu refere.
Tan ne’e iha janela transferensia iha fulan Janeru epoka 2021 ha’u livre husi janela tranferensia no hein klubu ne’ebé deit mak prontu atu simu kontratu foun.
Hatan ba asuntu ne’e Jestor klubu Boavista FC Timor Ezzy Leong afirma konaba guarda rede Aderito klubu entrega karta kontratu ba nia atu asina, maibe jogador hotu asina tia, nia lori karta ne’e ba fali uma halo klubu hein nia la resposta, klubu hili dalan hodi rekruta fali gurarda rede seluk. (Eug).
