Dili – Orgaun Federasaun Futeból Timor-Leste (FFTL) sei kria Liga futeból Femenina (LFF) nian, sei akontese iha fulan Marsu no sei remata iha fulan Abril tinan ne’e nia laran.
Adjuntu sekretáriu jerál FFTL Frederico Martins informa, iha tinan ne’e sira sei kria liga femenina rua hanesan primeira divizaun ho klasifikasaun husi sub 21 to’o 25 ho klubu 5 no segundu divizaun hahú husi sub 6 to’o 11 ho klubu 6.
“Ba jogu segunda divizaun sei hahú iha loron 5 fulan Marsu no jogu primeira divizaun sei realiza iha iha loron 6 fulan Marsu no sei remata iha loron 1 fulan Abril tinan ne’e”. Hateten nia iha salaun Xanana Sport Centre, Sexta (08/01/2021).
Nia mós esplika, jogu segunda divizaun nian ho total jogu iha jornada 10 sei hasoru malu dala ida de’it, nune’e mós jogu primeira divizaun ho klubu 5 sei joga dala haat.
Banhira jogu femenina ne’e sai ona liga, parte federasaun presiza klubu sira atu prense rekezitus balun hanesan legalidade ba estatutu klubu, estrutura klubu no mós konta Bancaria klubu nian.
Enkuantu relasiona ho situasaun covid-19, nune’e obriga estadu tenki dekreta tan Estadu Emerjenjia ba dasiak, tan ne’e hodi halo mós atividade desportu barak mak pendente.
Maibé parte FFTL sei kria orariu ida ba treinadór sira atu treinu jogadór selesaun nasionál sira sei fahe ba grupu tolu no akumula de’it jogadór na’in 9 iha kampu laran bainhira iha treinamentu. (Vidal).
