DILI – Ekipa futeból feto hosi klube Buibere manan tan tasa eroína Rosa Muki Bonaparte hodi kompleta títulu daruak iha tinan 2020.
Manan Tasa Rosa Muki la dook hosi kontribuisaun jogadór morena Nilda romana kamizola 13, nia fó kontribuisaun ikus hodi hamosu golu iha minutu 45+, jogu parte dahuluk nian iha final kontra AD SLB Laulara iha Estádiu Munisipál Dili, Domingo (20/12).
Úniku golu ne’e mantein mezmu ekipa adversáriu koko domina bola durante jogu, maibé lahamosu golu hodi empate jogu rezultadu ikus mai Buibere mantein sai kampiaun.
Durante jogu, Nilda tun dala hat ho line up starter, no hamosu golu tolu ho total minutu jogu ne’ebé desportu.xyz arkiva ho total minutu 170.
Sorin seluk, treinadór SLB Laulara apresia ho rezultadu jogu no kongratula adversáriu.
“Ami falla iha bola falta uitoan,” deklara ofisial SLB Laulara, Joao Manuel Pimentel Fernandes hodi haktuir ninia Laos lakon tékniku maibé faillansu antesipasaun deit.
“Ohin Buibere ninia sorte liu no parabéns ba Bubibere,” tenik ofisial ne’e hodi haktuir katak mezmu lakon jogu tanba golu maibé realidade durante jogu SLB maka domina.
Tasa Rosa Muki nudar tasa eskluziva ba partisipante liga futeból feto 2020 hosi ekipa sanulu resin so eskotilla deit ekipa melhor primeira too kuarta klasifikadu iha liga feto hanesan Buibere FC nudar kampiaun Liga futeból Feto tinan 2020, tuir Marantaha FC, tuir AD SLB Laulara, no tuir SAMUSER FC. (Augusto)
