Dili-Ekipa femenina husi Maranatha Fc derota ho nia adversáriu Buibere Fc ho scor 1-2, iha taxa “Rosa Mukit Bonaparte” iha faze kuatru finais tinan 2020.
Jogu refere kompostu husi ekipa hat hanesan Maranatha Fc, Buibere Fn, AD-SLB Laulara no S’amuser Fc , iha ne’ebé jogu refere tenki hakata direta ba kuatru finais.
Tanba ne’e Maranatha tenki hein ekipa rua AD-SLB Laulara kontra S’amuser iha jogu aban (17/12), hodi hadau malu ba terseru lugar.
Tanba ne’e tuir treinadór Maranatha Fc, josé Fernandes hateten, durante ne’e sira halo preparasaun di’ak, maibé simu derota tanba falla mós husi jogadór foun, ne’ebé mak haforsa sira nia ekipa.
“Ekipa Buibere nia jogadór kuaze selesaun nasionál ho esperiénsia ne’ebé di’ak, entaun sira bele manan ami nia ekipa”. Hateten treinadór ne’e iha Stadium Munisípal Dili-Kuarta (16/12/2020).
Maske derota ho nia ekipa adversáriu, maibé treinadór ne’e agradese ba nia jogadór, tanba sira hatudu duni saida mak durante ne’e fó treinu ba sira.
“Ohin iha fallansu balun iha téknika no jogadór sira físiku mós ladun di’ak”. Nia rekoñese.
Nia promete maske lakon ho Fc Buibere, maibé nafatin halo preparasaun, nune’e mós sei hadi’a buat balun ne’ebé ohin iha fallansu, nune’e jogu tuir mai bele hadau malu iha terseru lugar.
“Hau garante sei okupa iha terseru lugar”. Nia promete. (Vidal).
