Dili – Presidente Liga Futeból Timor Leste (LFTL), Nilton Gusmão, apresia tebes ho adeptus husi AD-SLB Laulara ho Lalenok United Fc, tanba hatudu tebes sira nia disiplina, maske adeptus sira tur de’it iha rai (kampu ninin) hodi asiste jogu finál taxa 12 Novembru tinan ne’e.
Tanba to’o jogu termina Lalenok United mak sai Kampeaun ba taxa 12 Novembru, maibe adeptus sira hatudu disiplina hodi festeza ida-idak nia ekipa ho situasaun hakmatek.
Tuir presidente LFTL ne’e katak, agradese ba adeptus husi ekipa rua hodi asiste jogu refere to’o remata, ho disiplina tebtebes, maske ho kondisaun infrastrutura la sufisiente atu akomoda adeptus sira, maibé ho adeptus sira.
“Hau kontente teb-tebes ho ema hotu bele partisipa hodi fo apoiu ba ida-idak nia klubu, ne’e hatudu ona katak iha Timor ita iha ona paisaun ba futeból”. Hateten nia iha stadium Munísipal Dili-Domingu (12/12/2020).
Ho situasaun adeptus barak mak tur de’it iha rai, hodi asiste jogu refere, presidente LFTL afirma, situasaun ida ne’e ita nia governu sira bele hare rasik, ita nia kondisaun infrastrutura la akomoda adeptus sira hodi asiste jogu futeból.
Nune’e mós nia hatutan, ho partisipasaun adeptus sira nian ne’e hanesan parte ida hodi motiva klubu sira iha vontade atu hadi’a sira nia klubu di’ak liu tan iha futuru.
Nia mós preokupa, mesmu iha Dili kampu ida bot liu, maibé nia kondisaun rehabilitasaun seidauk prontu to’o ohin loron.
Nia garante ukun na’in sira konsiente ho situasaun sira ne’e, nia fiar katak governu ida mai sei buka atu hadi’a kondisaun infrastrutura sira ne’e.
“Ita tenki kontra regras FIFA nian uitoan, tanba ema hare jogu besik liu kampu ninin, lolos ida ne’e labele asiste iha futeból, maibé ita kondisaun mak hanesan ona”.
Presidente LFTL ne’e mós agradese ba media sira, tanba hamosu paisaun ba adeptus sira nia fuan no klubu sira liu husi informasaun futeból nian.
“Hau hanoin media sira mos nia papel importante, tanba fo sai informasaun sira ne’e mak halo tinan ba tinan, klubu ida mak manan hela de’it ne’e hatudu sinal di’ak tebes”. Nia hakotu.(Vidal)
