Dili – Treinadór Lalenok United Fc, Simon Elessetche deklara, aban joga kontra FIEL, sei mai ho estratéjia forma liña jogadór la hanesan, tanba hakarak halo rotasaun ba jogadór sira ne’ebé supliente, durante jogu hirak liu ba, atu tun fila fali iha jogu minutu dahuluk bainhira konta ekipa adversáriu.
Tuir treinadór ne’e katak, durante loron hirak ne’e sira preparadu los, tanba iha Tersa foin lalais sira joga tray out kontra DIT, tan ne’e nia konsidera jogadór Lalenok joga kuaze hanesan, la iha ida mak joga la di’ak, tanba ne’e iha jogu kontra FIEL ne’e hakarak promove sira hodi hasa’e sira nia prestasaun jogu ho di’ak liu tan.
“Rotasaun jogadór la’os konsidera FIEL, joga fraku, maibé hakarak halo rotasaun tanba jogadór sira balu joga ona iha jogu FFTL tun primeiru, no balun suplentu hela, entaun liu husi rotasaun jogu ne’e sira bele joga uluk fila fali”.Lia hirak ne’e, treinadór Lalenok United’s ne’e hato’o iha nia konferénsia imprensa, iha sala LFTL Xanana Sport Centre, Nuularan-Kuarta (18/11/2020).
Tanba ne’e nia mós afirma, nia ekipa tenki manan, tanba daudaun ne’e jogadór maiória forsa, so iha jogadór ida mak iha kondisaun saude mak la dun saudavél.
“Ita hatene iha jogu sira liu ba FIEL manan tiha Nagardjo, tanba ne’e FIEL mós forsa, ne’ebé nafatin respeitu sira, entaun ami mós tenki prepara atu hasoru sira”. Nia rekoñese.
Enkuantu nia mós iha tarjetu, Lalenok tenki hatudu jogu ne’ebé di’ak no halo animasaun ba adeptus sira, no importante liu mak tenki manan.
Nune’e mós kapitaun, Lalenok United, Francisco da Costa mós afirma, sira prontu no preparadu, hodi joga kontra FIEL. (Vidal).
