Dili – Primeiru-Ministru (PM), Taur Matan Ruak hato’o ba representante Konselu Nasionál Dezenvolvimentu Juventude (KNDJ) sira katak, kna’ar ne’e hanesan buat todan ida, tanba atu buka oportunidade, indentifka oportunidade hodi integra juventude sira ba dezenvolvimentu nasionál.
Tanba ne’e, ‘Taur Matan Ruak’, husu KNDJ atu esforsu-aan servisu maka’as hodi integra juventude sira ba prosesu dezenvolvimentu nasionál, tanba KNDJ hanesan matadalan ba joven sira.
“Servisu sira ne’e laos kaman, ne’e todan, tanba iha buat tolu mak presiza halo ‘sei halo estudu hodi indentifika dezafiu, buka oportunidade, indentifika oportunidade hanesan solusaun, iha ita nia rain, liu husi setor privadu ho setor sira seluk ba oportunnidade sira, nune’e presiza joven sira atu kontribui iha dezenvolvimentu nasional”. PM Taur hato’o lia hirak ne’e hafoin fó tomada de pose ba representante menbru KNDJ sira iha salaun Ministériu Finanas Airtarak Laran-Dili, Segunda (16/11/2020).
Tuir nia katak, KNDJ sei halo kordenasaun ho instituisaun publiku no privadu sira, sosiedade sivil, hodi enkuadra joven sira iha oportunidade ne’ebe nasaun iha.
Enkuantu tuir estabelesimentu Dekretu-Lei KNDJ nian, artigu No.27/2016, 32 de Agostu, define ona iha orgaun juventude nian, tanba ne’e orgaun ne’e hanesan akonsellamentu hodi buka kordena ho instituisaun publiku no privadu sira hodi integra joven sira iha prosesu dezenvolvimentu nasionál.
Nune’e mós Sekretáriu Estadu Joventude no Desportu (SEJD), Abrão Saldanha ‘Nokosiko’ hateten, joven sira sei iha problema ba enpregu no menus formasaun, tanba ne’e Konsellu Nasionál Dezenvolvimentu Joven (KNDJ), tenki iha intervensaun iha liña minteriais sira hotu, hodi buka oinsa problema joven sira nian, tanba la’os SEJD mak toma konta de’it.
Tuir nia katak, papel KNDJ nian mak atu halo liña kordenasaun hodi promove planu asaun integrada ida ba servisu joven sira hotu nian, tanba orgaun ne’e serbisu iha liña inter ministerial sira hotu nian.
“Problema joven sira nian mak enpregu no menus formasaun, empregalidade joven sira nian, tanba ne’e konsellu ne’e buka oinsa iha intervensaun iha liña minteriais sira hotu, tanba laos SEJD mak toma konta deit atu hare ba iha joven iha turismu, joven iha komersiu, iha siensia no teknolojia no seluk tan”. Dehan nia.
Membru KNDJ hamutuk 17, nia mandatu ba tinan 4, ne’ebe representa husi liña ministeriasi sira.
Governante ne’e mós argumenta, orsamentu tomak iha SEJD nian, maibé sei hahú uluk ho nia estabelesimentu sekretariadu sira, tanba normalmente orsamentu barak liu mak iha ministériu sira ne’ebe mak involve iha programa ne’e, liu husi kordena interministerial sira hotu.
Iha tomada de pose ba konsellu ne’e hamutuk ema 17, ho mandatu ba tinan 4 ne’ebé representa husi diretores nasionais governu nian, setores privadu sira, Conselho Nacional Juventude Timor Leste (CNJTL), no Assosiasaun ema ho Difisiensia Timor Leste (ADTL).
Iha serimonia tomada de pose ba KNDJ ne’e, hetan partisipasaun husi menbru governu balun, no konvidadus sira. (Vidal).
