DILI – Asosiasaun Jornalista Desportu Timor Leste (AJORSTIL) hatama karta lamentasaun ba Federasaun Futeból Timor Leste (FFTL) relasiona ho dezintendimentu jornalista ho Match Commissioner iha jogu final Kopa FFTL ne’ebé mak hala’o iha estádiu café de Ermera.
Fukun refere maka mosu diskusaun manas entre komisáriu jogu Zelagio da Silva muda obrigatoriu jornalista sira hosi fatin definitivu hodi ba fatin seluk, antes ekipa finalista rua Lalenok United kontra Ad SLB ne’e mak realiza iha estadiun Café de Ermera Gleno domingu (25/10).
Prezidenti AJORSTIL Evangeslito Gantry do Santo Meilana hatete jornalista barak preokupadu no hamosu kestaun hodi hatama karta lamentasaun hotu.
“Ho karta lamentasatun ne’e ami halibur malu iha asosiasaun AJORSTIL halo karta ba lideransa másimu FFTL atu halo xamada atensaun ba Zelagio da Silva ho aktu ne’ebè mak nia halo atu labele repete tan iha futuru,” deklara dirijente AJORSTIL ne’e ba jornalista iha sede FFTL, kinta (29/10).
Nia afirma AJORSTIL husu ba FFTL tenke kria fatin dignu ida ba jornalista desportu sira bainhira realiza eventu ruma atu ne’e jornalista bele halo kobertura ho livre.
AJORSTIL mós iha vizaun ida pronto atu sai parseiru ho federasaun desportu sira seluk inklui FFTL karik husu tulun ba AJORSTIL atu nune’e akontesimentu hanesan labele repete tan iha futuru. (Ekipa Desportu.XYZ).
