DILI – Treinador Lalenok United Simon Elissetche hatete ho oin midar nia ekipa bele hatudu rezultadu jogu diak hodi halakon Boavista de Timor 3-2 iha kuartu finais halo Lalenok hakat ba final copa Federasaun Futebol Timor Leste.
Tuir Simon katak jogu entre ekipa rua iha kuartu finais hanesan jogu final, tanbà ekipa ida-idak mai ho anbisaun hakarak hetan rezultadu ida diak atu hakat ba final copa FFTL.
“Hau haksolok Lalenok bele hakat ba final copa FFTL hodi ekipa hein Assalam ho SLB Lalaura ida ne’ebè mak sai vensedor atu kontra ami iha jogu final” relata Simon ba jornalista iha estadiun munisipal Dili Tersa (20/10).
Nia haktuir kontente ho jogador Lalenok nia performa iha jogu primeira parte diak, maibè iha segundu parte Boavista hatudu jogu nakloke hodi rezulta golu ida ba Lalenok.
“Iha golu segundu Boavista nian halo hau tristi tanbà guarda rede Lalenok United Fagio Pereira la kontrola bola barullu husi jogadór Fransyatma Kefi nia ain,” espresa Treinador Chileno ne’e.
Simon hatutan preparasaun Lalenok nian ba jogu final sei másimu liu tan, tanbà jogu final ekipa adversáriu mós hakarak la koi lakon iha final ne’ebè mak sei hala’o iha Domingu (25/10) estadiun Café de Ermera. (Eug)
