Dili – Ekipa AD. SLB Laulara kompleta ona jogu haat iha grupu D, tan ne’e tenki rekolla pontus 12, ho bola pozitivu 4, tan ne’e SLB serteza ona hakat ba oitavu finais, tanba sai mellor kampeaun iha sira nia grupu.
AD.SLB Laulara, hala’o jogu ikus kontra ekipa adversáriu Lika-Lika Lemorai iha stadium Munisípal Dili, Domingu (04/10/2020), ne’ebé árbitru lideradu husi Eufrasio da Costa Silva, tan ne’e iha jogu primeira parte, jogu hahú la’o to’o minutu ‘32’, SLB uluk golu liu husi jogadór Jerimias Baptista, cabesa golu, bainhira simu bola krosin husi Abaka ho númeru kamizola 13 iha parte defeza liman karuk nian, hodi muda skor 1-0.
Depois de minutu ‘43 no 44’, Cornelio Portela ho númeru kamizola 11 no Mouzinho de Lima ne’ebé uza númeru kamizola 10, lidera tan golu rua, tui-tuir malu hodi muda skor 3-0 to’o jogu primeira parte termina.
Hafoin hakat ba jogu segundu parte, SLB nia jogadór Mouzinho hatama tan golu haat, nune’e mós João Pedro ne’ebé uza kamizola númeru 7 no Sandro Quintão ne’ebé uza kamizola númeru 14 mós hatam golu ida hodi muda skor 9-0, to’o jogu segundu parte remata.
Tuir asistente treinadór AD,SLB Laulara Nivio Alves hateten, nia parte kontente tebes ho rejultadu ohin sira hasoru ekipa adversáriu, tanba lakon no halo empata mós sira nafatin hakat ba oitavu finais.
“Hau bele dehan, ekipa Lika Lika mós joga di’ak, tanba sira iha jogu primeira parte sira halo presaun, maibe hakat ba jogu segundu parte sira tun, entaun ami nia jogadór aproveita hatama golu barak”. Dehan asistente treinadór ne’e.
Nia promete, ba oin nafatin prepara tanba jogu tuir mai, nia konsidera jogu ida iha liu leten, tanba iha faze oitavu finais ekipa ne’ebé derota nia tenki sai.
“Iha oitavu finais ne’e, ekipa hotu hotu iha presaun nia laran, tanba ne’e ekipa hotu nia preparasaun ne’e hanesan. (Vidal)
