DILI – Klube futeból Boavista Timor dada anin fresku livre iha kualifikasaun preliminár hodi hakat sai hosi Grupu D ba iha oitavu finais Kopa FFTL 2020.
Ekipa ne’ebé sarani naran hosi Carsae FC ne’e ho susesu rekolla pontu 3 iha jogu da-hat hasoru Kablaki FC liu hosi sorte sutu penalidade ba adversáriu Kablaki FC primeira parte.
Jogu da-hat ne’ebé organiza iha estádiu munisipál Dili 30/09/2020 ne’e la’o kompetitivu no sorte monu ba Boavista iha minutu rohan jogu primeira parte tempu estra 45+2.
Insidente kastigu penalidade refere kauza hosi liña kotuk Kablaki FC komete erru hand to ball iha area risku laran.
Ho nune’e Jogadór kamizola 8, Nataniel Reis hetan fiar hodi ezekuta penalidade refere ho susesu no hamosu netik golu ida antes termina primeira parte jogu hodi lori Boavista lidera jogu 1-0.
Ekipa rua tama fali segunda parte kontinua hatudu jogu esforsu jere no atake iha kampu laran, mezmu halo substituisaun ba jogadór hotu maibé rezultadu mantein primeira maibé milagre ba Boavista akontese iha minutu ikus parte daruak nian, liu hosi jogadór Fransyatma Kefi lori duni Boavista xave vitória ho rezultadu 2-0 hodi termina jogu.
Boavista rasik iha entrada jogu iha Grupu D sofre derrota ho SLB Laulara 3-2 no manan Emanuel FC 2-0, no empate fali ho Lika Lika Lemorai 2-2. Ikus manan Kablaki 2-0. Ho nune’e Rekolla vitória rua empata ida no derrota ida iha jogu haat. Total pontu 7 ho bola 3. (ato)
