Dili – Ekipa Sporting de Timor FC sei iha oportunidade tama faze 8 finais, tanba rekolla fila fali pontu tolu, bainhira halakon ekipa Akadémika FC, iha jogu daruak grupu C, ba copa FFTL tinan ne’e.
Tuir treinadór Sporting de Timor Moises da Silva hateten, nia parte kontente tebes ho rejultadu kontra akademika ho skor 3-1, tanba jogadór sira serbisu maka’as no hatudu joga ho ritmu ne’ebé di’ak.
“Hau fó parabens jogadór sira tanba iha jogu ’90’ minutus la iha kole”. Hateten treinadór ne’e iha fatin konferensia imprensa stadium Munísipal dili-Sexta (18/09/2020).
Treinadór ne’e mós dehan tan, jogadór sira hatudu duni jogu ne’ebé mak durante ne’e sira prepara, tan ne’e, bele fó duni rejultadu di’ak iha nia ekipa.
Tanba ne’e, treinadór ne’e afirma liu tan, iha jogu primeira parte sira iha oportunidade barak ba jogadór sira atu hatama golu, maibé nia rekoñese, ida ne’e mak jogu.
“Ohin ne’e oportunidade barak, tanba loloos ne’e iha minutu ‘5’ ami golu rua tiona, maibé ida ne’e mak jogu, tanba dala ruma baliza mesak mós bele la golu, ne’e mak natureza jogu. Dehan Nia.
Enkuantu, nia promete ba oin sei hadi’a parte hirak ne’e sei falla.
Treinadór ne’e mós optimista, nia ekipa sei iha oportunidade ba faze 8 finais, maske ekipa Sportin derota ona dala ida, maibé rekolla fila fali pontu tolu.
Tan ne’e treinadór ne’e promete, sira prepara di’ak liu tan, tanba sira hela jogu rua tuir mai iha sira nia grupu. (Vidal).
