DILI – Akompañamentu desportu.xyz haree Klube Ponta Leste nu’udar ekipa dahuluk ho susesu hakat ain ba faze tuir mai iha oitavu finais kopa FFTL 2020, rekolla pontu 9 hosi jogu tolu no falta jogu restu ida.
Kontribuisaun la dook hosi avansadu kamizola 27, Silveiro Garcia ne’ebé marka tan golu rua iha jogu datoluk konta Klube Fitun Estudante Loro Sa’e hodi arkiva ninia prestasaun durante partisipa Kopa FFTL 2020. Sesta (11/09).
Hasoru Ekipa Fitun estudante, jogadór ho kamizola 27 ne’e produs tan golu rua iha minutu 64 ho minutu 75. Antes ne’e Garcia halo hatrick ba dala rua hodi hlidera Top Score provizória iha Copa Federasaun Futeból Timor Leste FFTL 2020.
Jogu daruak, Jogadór joven, Anizio halo istória iha ninia karreira iha desportu futeból, ba sá kompetisaun futeból nivel altu iha rai laran ne’e nia mós marka ho ninia istória rasik. Anizio maka jogadór ne’ebé marka Kuatrick golu hat iha jogu Ponta Leste kontra AS Marca.
Iha jogu dahuluk, Ponta Leste vs Atlétiku ultramar manan 4-1. Ho rezultadu ne’e Ponta Leste produs golu 13 no sofre golu rua, ida mai hosi Ultramar no ida seluk mai Hosi jogu ikus hasoru Fitun Estudante.(Augusto)
