DILI – Lendáriu futeból Indonesia Timor-Leste, Miro Valdo Bento, apresia ba jogu ne’ebé hatudu hosi ekipa adversáriu ne’ebé foin promove hosi divizaun 3 Emanuel FC.
“Ha’u foti Xapeu ba jogadór Emanuel sira, tanba sira mesak labarik maibe sira nia jogu halo Boavista hikis kosar kontra sira nia ataka iha liña oin,” Miro hato’o lia ne’e ba jornalista sira iha salaun konferénsia imprensa, estádiu munisipál Dili,
“Jogadór sira hotu labele angap remeh haree ki’ik jogadór adversáriu sira,” tenik Miro hodi fo hanoin ba ekipa hotu hotu atu respeita no konsidera nafatin ekipa hotu hotu atu hatudu jogu diak hanesan emanuel FC hatudu ona.
Nia rekoñes, jogu kontra Emanuel FC jogu monu liu iha avansadu, tanbà jogador sira foti a’an hodi hare ekipa Emanuel FC labale ba sira.
Durante jogu, Hafoin árbitru Pedro Maia (Apeu) huu kick off, Boavista kontrola kedas bola hodi dudu sae ba area risku Emanuel FC, iha minutu ida nia laran bola tun sae dala tolu, ba dala ikus nian hamosu duni golu.
Golu dahuluk ne’e mosu iha minutu ida, nune’e jogadór kamizola 21 hosi Boavista (Fransyatma Kefi) provizoriamente nudar markadór ne’ebé hamosu golu lais liu iha kopa FFTL 2020 ne’e.
Golu refere nudar kolaborasaun atake no oferta assist hosi kamizola 11, Abrão Mendonça iha area risku laran ho momentu barullu, Kefi tama hosi liman loos mai hodi hatama bola ba rede ho ulun hodi lori Boavista lidera 0-1.
Jogu kontinua la’o, ekipa Boavista sempre kontrola bola hodi halimar iha kampu no pasajen badak no dook, maibé atu hamosu golu susar los tanba ekipa Emanuel FC iha dixiplina forte oinsá atu jere distánsia jogadór adversáriu ho bola, nune’e sempre aperta hodi hasai bola nomós hamosu oportunidade hodi dudu bola too area risku Boavista FC nian.
Ikus mai, iha minutu 26, nafatin liu hosi counter attack jogadór kamizola 77 (Boateng) liu hosi kolaborasaun assist hosi jogadór kamizola 20 Gaudencio Monteiro iksu mai Boateng produs bola segundu ho ulun hodi tama rede lori Boavista ukun joga 0-2.
Golu rua ne’e metin to ekipa termina primeira parte no tama fali segunda parte ekipa rua mantein jogu presaun ba malu maibé la hamosu golu adisional. No segunda parte mos mantein ho rezultadu 0-2. (Eugenio)
