Dili – Coach husi ekipa Sporting FC apresia nia jogadór, maski derrota ho ekipa Karketu FC iha jogu dahuluk ba kopa FFTL tinan ne’e.
Tuir treinadór ekipa Sporting, Moisés da Silva hateten, nia triste bainhira nia ekipa derrota ho ekipa Karketu, maibé nia apresia nia jogadór sira, tanba bele realiza duni golu ruma hasoru ekipa Karketu.
“Ha’u fó parabéns ba jogadór sira, tanba sira ezekuta duni orientasaun ne’ebé mak durante ne’e fó ba sira”. Hateten treinadór ne’e iha fatin konferensia imprensa stadium Munísipal Dili, Kuarta (02/09/2020).
Tanba ne’e, nia rekoñese tan, ohin nia ekipa derrota ne’e mós tanba nia jogadór ida hetan aleiza, nune’e labele partisipa iha jogu refere, tan ne’e fó mós impaktu ba nia ekipa.
“Ha’u nota ne’e, sira nia movimentu iha liña oin atu hatama golu ne’e mak menus,” Nia rekoñese.
Treinadór Sporting ne’e hateten tan, jogu ne’ebé nia jogadór aplika iha kampu laran ne’e tanba tuir preparasaun ne’ebé durante sira prepara, tan ne’e iha duni fallansu balun iha liña oin no parte liña defeza nian, nune’e halo ekipa Karketu konsege prodús golu.
“Ita hatene katak, Karketu hanesan ekipa ne’ebé forte tanba iha jogu LFA tinan 2016, sira mós joga di’ak”. Nia hateten.
Enkuantu, treinadór ne’e promete, sira sei hela jogu tolu, tan ne’e, jogu tuir mai nia sei prepara nia ekipa forte liu tan, atu hasoru ekipa seluk.(desportu.xyz)
