Dili – Treinadór As Marca FC, Romão Guterres hatete hanesan bainaka foun iha copa Federasaun Futebol Timor Leste FFTL sira prontu simu rezultadu 0-7 hosi Ponta Leste.
Ekipa AS Marca foin mak promovidu husi tersera devizaun ba segundu devizaun iha Liga Futtebol Amadora tinan kotuk hodi partisipa iha copa FFTL tinan ne’e.
Ida ne’e hanesan jogu dahuluk ba AS Marca mai compete kontra kedas ekipa Ponta Leste ne’ebè mak ho nivel altu a’as iha jogu Liga Futebol Timor Leste.
“Ami hanesan ekipa foun hodi sai bainaka ba copa FFTL pronto simu lakon, tanbá hanesan esperensia ida ba AS Marca hodi kompete ekipa sira ho nivel altu” dehan Romão Guterres ba jornalista iha estadiun munisipal Dili Domingu (30.8)
Nia relata ho score 7-0 hanesan lisaun bo’ot ida ba ninia ekipa atu estuda fali eru sira ne’ebe hatudu ona jogu kontra AS Ponta Leste.
“Jogu ida kontra Ponta Leste ne’e ami la brani atu sai husi area defeza tanba iha primeira parte AS Marca uza Sistema 4-4-2 hodi salva nia adversariu ne’ebé mak domina liu bola,” tenik Rumão.
Trenador reafirma katak As Marca sei halo fali perparasaun diak hodi hetan fali rezultadu diak kontra ekipa tolu hanesan Fitun Estudante, Atletico Ultramar, Nagardjo FC. (Eugenio)
