DILI – Delegadu munisípiu Baukau iha kopa FFTL 2020, Ekipa Zebra FC simu realidade ba derrota 1-5 hasoru adversáriu jigante iha Timor-Leste Lalenok United iha estádiu munisipál Dili, (29/08).
“Ami hasoru kedas ekipa ida ke boot iha Timor no sira iha fasilidade no esperiénsia internasionál,” deklara treinadór Zebra FC, Rogério Mok ba jornalista sira iha salaun konferénsia imprensa.
Nia rekoñese ekipa adversáriu nu’udar ekipa ho kualidade aas nune’e iha sira nia jogu dahuluk kontra kedas ekipa boot ne’e halo sira mós la espera bele derrota.
Treinadór ne’e kompara, partisipasaun Zebra nian iha segunda divizaun Liga Futeból Amadora, hatudu performa gráfiku ne’ebé tun.
“Ami la imajina ke ami lakon ho menus hosi 5,” haktuir RM katak tuir sira nia predisaun sira sei simu golu liu 5, realidade oin seluk, rezultadu ne’e sai nafatin esperansa no motivasaun ba sira.
“Ami sei hadi’a fali liña ba jogu tolu mai,” haktuir Mok hodi dehan katak iha jogu dahuluk ne’e ninia ekipa hetan difikuldade iha liña kotuk. (augusto)
