(DTL 26/8/2020) – Hafoin derota kontra Fitun Estudante Lorosae iha 1-2 jogu grupu B treinador Nagardjo FC Silbino Soares fo sala ba jogador mediu no avansadu la hatudu jogu ne’ebè mak diak.
Hafoin remata jogu entre ekipa rua treinador Nagardjo FC hateten katak iha jogu premeira parte jogador Nagardjo domina liu bola kompara ho nia adversariu Fitun Estudante.
“Hau hanesan treinador fo sala ba jogador sira liu-liu iha mediu no avansadu tanbà halo estraga bola diak iha liña oin fo inpaktu ba defeza kotuk,” relata Silbino Soares ba jornalista iha estadiu munisipal Dili kuarta (26/08).
Nia hatutan Nagardjo nia tarjetu ba jogu ohin tenki foti pontu 3 husi Fitun Estudante tanbà sira ekipa ida ne’ebè mak la dun forsa hanesan ho ami.
Ho mehi ne’ebe mak iha ikus mai jogador Nagardjo la hatudu iha pratika tuir treinador nia hakarak atu manan kontra Fitun Estudante.
Iha jogu sempre lakon no manan tanbà ne’e Nagardjo FC sei hadia fallansu ne’ebè mak jogador sira komete, ami fiar katak jogu tolu tuir mai ne’e Nagardjo sei hetan vitoria.
Fo hanoin katak Nagardjo monu iha grupu B mak hanesan Ponta Leste, Atletico Ultramar, no As Marca. Iha jogu tuir Aitana sei kontra Portu Taibesi iha Estadiu munisipal Dili tuku 16:00 OTL. (Eugenio)
