DILI – Akadémika FC informalmente hasoru jornalista sira iha entrada ba Pitch iha Estádiu Munisipál Dili hodi halo konfirmasaun ba notísia ne’ebé publika hosi wwwdesportu.xyz hafoin akadémika derrota hasoru Karketu Dili, Sábadu (22/08).
“Ami atu halo press conference hodi hatán notísia ne’ebé sai iha media copa FFTL”, hateten dirijente Klube Gil Conceição iha konversa ho jornalista sira.
Tuir planu Akadémika-FC sei halo konferénsia imprensa iha loron segunda (24/08) hodi klarifika situasaun loloos kona ba publikasaun notísia refere.
Basá tuir sira mosu buat balun falta kona ba protokolu jogu nian, nune’e FC Akademika la hola parte iha konferénsia imprensa foin lalais.
Enkuantu jogu remata loron sábadu ne’e, ekipa Karketu maka halo uluk konferénsia imprensa, no ekipa media hein duni Akadémika iha laran maibé la mosu ba.
Deskonfia, iha sinál katak asaun ne’ebé Akadémika halo hanesan asaun protestu hasoru arbitrajen iha ligasaun ho insidente bola golu ne’ebé la konsege hetan konsiderasaun.
Jogadór kamizola 8 Joel Gaio (Akadémika FC) konsege lansa bola dook direita (ho velosidade segundu 3) no kona trave monu ba rede laran ho lais bola semo sai fali.
Ambiente ne’e lori fali sorte di’ak ba iha Karketu basá arbitru ho distánsia dook metru 45 tarde to’o hosi rede Karketu inklui asistente árbitru mós tarde to goal line hodi deside bola refere golu ou lae.
Franky Cardoso, guarda rede karketu aproveita la rona apitu lian no juís liña tarde to fatin, guarda rede nee hakuak bola metin, nune’e árbitru Jaime Gonçalves la hasai desizaun ruma kontinua fali jogu normal to jogu termina. (Augusto)
