(DTL-Treinadór Lalenok United FC, apresia nia jogadór,bainhira halakon Assalam FC, iha jogu prelimináriu grupu A, ba Copa FFTL tinan ne’e.
Tuir treinadór Lalenok United FC Simon Elissetche hateten, sira kontente bainhira manan iha jogu dahuluk entre FC Assalam, tanba ida ne’e importante tebes iha kompetisaun copa FFTL tinan ne’e.
“Ami kontente loos, banhira manan iha jogu ne’e, tanba ami nia jogadores sira serbisu maka’as, no sira joga rápidu no kapas tebes”.
Hateten Simon iha konfrensia inprensa iha Stadium Dili, Kinta (20/08/2020).
Enkuantu nia afirma, durante tempu barak ekipa hotu la hala’o jogu ruma, tanba situasaun, tan ne’e iha copa refere fó oportunidade ba sira atu partisipa hodi hatudu tan jogadores sira nia prestasaun jogu ba copa FFTL tinan ne’e.
“Iha posibilidade ba ami atu hatudu tan ami nia prestasaun jogu, liu husi copa FFTL tinan ne’e”. Nia afirma.
Tan ne’e, tuir nia observasaun ba jogadores sira nia prestasaun jogu la’o di’ak tebes, hodi manan iha jogu jornada dahuluk entre FC Assalam ho skor 2-0.
Nia relatan tan, ba oin nia ekipa nafatin preparadu atu hasoru ekipa se de’it mak atu hasoru nia ekipa iha kompetisaun copa ba tinan ne’e.
“Ami nia ekipa forsa nafatin atu hasoru tan ekipa sira seluk, maibé serbisu ba ami iha loron tuir mai mak serbisu maka’as, maibé depende ba ita nia sorte husi jogu ne’e rasik”. Hakotu nia. (Vidal).
