DILI – Klube jigante iha Dili, Lalenok United FC nu’udar ekipa forte hetan vitória dahuluk hasoru Assalam FC, enkuantu jogadór Lalenok balun sofre problema fíziku iha jogu preliminár ha grupu A kopa FFTL 2020 ne’e.
Hafoin apitu lian hosi árbitru Pedro Carvalho kick off primeira parte hahú, Lalenok hatún jogadór lokál maioria no sikat ho estranjeiru na’in rua hanesan Cristian (Brazil) ho Adade (Ghana).
Minutu 10 primeira parte nian, ekipa rua la dun halo presaun no penetrasaun jogu ne’ebé hamosu perigu. Mezmu nune’e iha minutu 10 inísiu ne’e lalenok maka domina liu hodi kontrola no atake, maibé adversáriu Assalam mós nakonu ho dixiplina hodi xave jogadór ida pur ida no hatudu dixiplina forte iha liña klaran.
Sei iha jogu nia laran, derrepente Arbitru Pedro Carvalho hapara jogu basá jogadór númeru 10 hosi Lalenok sofre uluk aleiza iha ain, situasaun ne’e obriga ofisial médiku Lalenok halai tama kampu hodi fó atendimentu ba Elias iha kampu ninin.
Bola kontinua la’o, Lalenok halimar barak bola hosi ain ba ain, maski nune’e Assalam ho lais hadau no hasai. Tentasaun ba tentasaun hosi Lalenok susesu iha minutu 16, bainhira jogadór atakante lalenok, Cristian iha oportunidade avansa ba oin, maibé mosu netik fouls komete hosi jogadór ssalam nian ho distánsia 19 ou 20 metru hosi rede.
Bola falta ne’e lori sorte ba Lalenok, jogadór orijen hosi Ghana, Daniel Adade ne’ebé ezekuta sutu livre indireita ne’e doko estádiu munisipál Dili hodi hamosu golu dahuluk iha istória kopa FFTL 2020 ne’e.
Bola ne’ebé suta hosi Adade ne’e as uitoan liu lutu ne’ebé monta iha grande area laran, guarda rede Assalam nian ho hakfodak la halo asaun salvasaun tanba sutu refere ba ho velosidade lais.
Hosi golu ne’e, hasae ritmu jogu lalenok nian hodi halo presaun nune’e loke dalan ba lalenok halo penetrasaun liu hosi jogadór kamizola 10 iha liman karuk, no ajuda malu ho Paulo Gali (kamizola 21) sira na’in rua halo tentasaun barak sobu defeza Assalam nian.
Iha minutu 26, Lalenok tenke troka jogadór Fabio Cristian eis jogadór atlétiku ultramar ne’e tanba sofre iha ain no monu dala rua, monu minutu rua antes, konsege hetan evakuasaun hosi ekipa sokoru, tuir fali nia tama fali kampu hodi joga maibé nia rasik monu iha kampu laran. Situasaun ne’e obriga fali Treinadór Simon hodi troka kedas ho jogadór Chile, Allan Mello (kamizola 8).
Iha munutu 27 ba leten, oportunidade barak hetan hosi Elias, oportunidade tui tuir malu, iha sinál hosi Elias liu hosi kooperasaun entre Elias ho Rofino Gama ne’ebé halo terror iha klaran loke sinál katak defeza liña liman loos Assalam nian seguru hela atu tama, Elias koko penetra no halo sutu dook besik grande area hatudu realidade katak salvasaun bola lametin hosi baliza Assalam nian Andrew Mensah (kamizola 12).
Elias halo ona tentasaun dala rua sutu direita ba guarda rede, Andrew Mensah konsege salva maibé ka kontrola diak no sempre bula muta sai hosi liman. Iha minutu 30, Elias ho fiar an duni tuir bola ne’ebé nia suta mai, halo guarda rede Andre ne’ebé toba hela iha rai la konsege salva bola ne’ebé rasik kaer la metin ho fasil Elias hakat mai dudu bola tama rede laran.
Tama fali iha segunda parte, ekipa Assalam fanun jogu mezmu forsa matéria la hanesan, troka mos matéria jogadór hodi hatama suplente, Bonarudin Amin troka Julião Amaral hodi hamoris jogu atake no kontra atake.
Substituisaun akontese mós ba Lalenok, Treinadór Simon tenke hasai tan Adade, basá haree hosi kampu li’ur katak nia kaer ninia kelen no monu iha kampu dala rua. Iha minutu 62, Adade sai tama fali suplente Tiago Xavier (kamizola 9).
Dalan ba minutu 80, ritmu jogu kuaze fahe hanesan, nune’e Assalam iha obrigasaun salva jogadór hosi akumulasaun kartaun, entaun hasai tan jogadór hasan Ramos no hatama fali Janito Carvalho.
To’o árbitru Apeu huu apitu ba dala ikus nian termina parte daruak, ekipa rua mantein rezultadu hosi primeira parte nian no termina jogu preliminár iha Grupu A ne’e ho vitória pertense ba Lalenok United FC ho golu 2-0. (Augusto)
