(DTL-13/08/2020) Akademika husi klubu Dili Institut off Teknologi (DIT), daudaun ne’e iha treinadór foun ida husi sidadaun Indonesia mai haforsa fila fali klubu DIT nian iha tinan ne’e.
Treinadór ho nasionalidade Indonesia ne’e ho naran Miall Malibata Armand ho idade 38, mai iha Timor Leste iha fulan Janeiru tinan ne’e.
Tuir treinadór ne’e, antes ne’e mos, nia lori ona klubu sira iha indonesia hetan susesu ona iha jogo sira iha indonesia nian.
“Hau nia esperiensia iha Indonesia lori ona ekipa lima, hahú husi PSSB iha Bogor, PSSB Madania Internasional, no ba fali iha Papua lori fila fali ekipa Persegan KI Mana lori tama iha terseru divizaun nian, no iha fali tinan 2011 hetan mós kampeaun ba segundu divizaun nian, no iha tinan 2012 hetan mós kampeaun ba primeiru divizaun”. Hateten treinadór ne’e ba jornalista desportu.xyz, bainhira remata treinamentu ba jogadores sira iha kampu DIT, Kinta (13/08).
Enkuantu, treinadór ho nasionalidade Indonesia ne’e, laos deit hetan kampeaun iha deit ne’eba, maibe nia mós muda ba FC Nadiri hetan mós kampeaun dahuluk iha segundu divizaun, no nia muda fila fali ba Bersigugin iha Papua, lori mós ekipa tama iha primeiru divizaun ba iha jornada 16.
Depois de treinadór ne’e remata nia kontratu iha klubu Papua nian.
Ho esperiensia hirak ne’e, halo ekipa FC DIT laran kona kedas, hodi foti fila fali nia, atu mai haforsa ekipa DIT ba tinan ne’e hodi hasoru kompetisaun bot kopa FFTL sei akontese iha tinan ne’e.
Treinadór foun ne’e, hahú fó treinamentu ba jogadores ekipa FC DIT nian, iha loron 27 fulan Julho tinan ne’e.
Tanba ne’e, treinadór ne’e afirma, relasiona ho preparasaun ba kompetisaun kopa FFTL ne’e, ekipa DIT nia jogadór sira hahú prepara kuaze semana rua ona.
“Kona ba preparasaun fisíku, ami finaliza ona, tanba fisíku ne’e ladun todan, tanba kopa FFTL mós besik ona, entaun presiza fokus liu atu treinu iha tatíku nian”. Nia esplika.
Nia mós iha esperansa, bainhira partisipa iha kompetisaun kopa FFTL tinan ne’e, sei garante bele tama to’o iha 16 besar ka bele tama mos to’o 8 besar nia laran.
Antes ne’e mós FC DIT rasik sai ona kampeaun, bainhira manan FC Aitana iha final kopa 12 ninian iha tinan kotuk, hodi muda iha segundu divizaun ba primeiru divizaun ba tinan ne’e.
Daudaun ne’e jogadór iha DIT rasik hamutuk 18, kompostu husi jogadores iha rai laran de’it no la iha jogadór estranjeiru ruma. (vidal).
