DILI – Ekipa nasionál futeból Timor-Leste sub 19 hala’o ona treinu iha kampu FFTL, no hatudu ona progresu balun iha kampu hodi hasoru oráriu kompetisaun internasionál.
“Sub 19 ninia frakeza maka komunikasaun,” deklara treinadór Xefe, Eduardo Pereira ba media desportu hafoin ekipa sub 19 halo jogu amizade ho ekipa senior iha kampu demokrasia (23/07).
Mellor treinadór LFA edisaun dahuluk nee hateten, Konfiansa jogadór sira durante jogu la’o di’ak liu hosi bola ain ba ain kontra atake , sa’e ho tuun.
“Sira nia kondisaun ko’alia ba malu maka ladún di’ak,” afirma treinadór ne’e. hodi observa, Jogadór balun komunika atu halimar pasa 1-2, maibé jogadór seluk sira halo drible fali.
“Komunikasaun di’ak, maka sub 19 sei joga di’ak liu tan,” reafirma treinadór ne’e ho esperansa.
Nia haktuir foin lalais sub 19 halo amizade ba dala rua ho objetivu atu haree kapasidade ekipa nian. Semana kotuk haree performa ladún másimu.
Treinadór Eduardo konfirma Iha jogu ba daruak iha loron 22 Jullu ne ekipa sub 19 konsege halo tuir duni lisaun ne’ebé mai hosi treinadór sira.
Durante surtu kovid-19, ekipa la hala’o treinamentu hamutuk maibé so hetan orientasaun hosi FFTL atu hala’o formasaun treinamentu fíziku liu hosi rede sosiál.
Rezultadu jogu amigavel ho ekipa senior, rezultadu empata 2-2. Ekipa senior konsege hamosu golu dahuluk iha primeira parte jogu, tuir kedas iha segunda parte ekipa sub 19 halo kontra atake no rezulta empata jogu 1-1, tuir kedas sub 19 lidera 2-1 maibé ekipa senior esforsu maka’as ikus mai rezultadu hatudu ema pata. (Desportu Timor-Leste)
